សេចក្តីលម្អិត៖: ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក (ស្ថិតក្នុងដំណើរការផ្លាស់ប្ដូរជាផ្លូវការ) សូមជម្រាបជូន វិនិយោគិន និងសាធារណជន មេត្តាជ្រាបថា៖ សេចក្ដីសម្រេចពីក្រុមប្រឹក្សាភិបាល លើការបោះផ្សាយលក់មូលបត្របំណុល (សញ្ញាបណ្ណបៃតង) សម្រាប់វិនិយោគិនគុណវឌ្ឍិ ដែលមានបុគ្គលធានា ជាមួយទំហំទឹកប្រាក់រហូតដល់ ១៥ លានដុល្លារអាមេរិកសម្រាប់រយៈពេលដល់ ៥ ឆ្នាំ ដែលបានទទួលការអនុម័តនៅក្នុងកិច្ចប្រជុំក្រុមប្រឹក្សាភិបាលនៅថ្ងៃទី ១០ ខែវិច្ឆិកា ឆ្នាំ២០២៣។ ទឹកប្រាក់ដែលទទួលបានពីការបោះផ្សាយលក់មូលបត្របំណុលនេះ ក្រុមហ៊ុនមានគម្រោងយកមកប្រើប្រាស់សម្រាប់ហេដ្ឋារចនាសម្ព័ន្ធបៃតង។ ការបោះផ្សាយសញ្ញាបណ្ណបៃតង នឹងនៅតែត្រូវត្រួតពិនិត្យ និងអនុម័តដោយភាគីពាក់ព័ន្ធដែលទាក់ទងក្នុងដំណើរការធានាជាអ្នកធានាសម្រាប់ការបោះផ្សាយមូលបត្របំណុលនេះ។ ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក (ស្ថិតក្នុងដំណើរការផ្លាស់ប្ដូរជាផ្លូវការ) កំពុងដំណើរការស្នើសុំការអនុម័តពីនិយតករមូលបត្រកម្ពុជា (SERC) និងផ្សារមូលបត្រកម្ពុជា (CSX) ស្របតាមច្បាប់ និងបទប្បញ្ញត្តិជាធរមាន ដែលរំពឹងថានឹងបញ្ចប់នៅដើមឆ្នាំក្រោយនេះ។ អាស្រ័យដូចបានជម្រាបជូនខាងលើ សូមវិនិយោគិន និងសាធារណជនមេត្តាជ្រាបជាព័ត៌មាន។