ភ្នំពេញៈ តំណាងផ្សារមូលបត្រកម្ពុជា (CSX) បានបញ្ជាក់ថាខ្លួនបានទទួលសំណើត្រួតពិនិត្យពីលទ្ធភាពបោះផ្សាយលក់ភាគហ៊ុន (LER) របស់ក្រុមហ៊ុនវិនិយោគលើផ្នែកថាមពល Pestech Cambodia រួចហើយ និងបញ្ជាក់ថា កំពុងដំណើរការត្រួតពិនិត្យឯកសារផ្សេងៗហើយគ្រោងផ្តល់ការឆ្លើយតបវិញក្នុងពេលឆាប់ៗ។
ការដាក់សំណើទៅឲ្យ CSX របស់ក្រុមហ៊ុន Pestech Cambodia ដែលជាក្រុមហ៊ុនបុត្រសម្ព័ន្ធរបស់ Pestech International មានមូលដ្ឋាននៅម៉ាឡេស៊ីនេះ បានធ្វើឡើងដំណាលគ្នាទៅនឹងសំណើដែលក្រុមហ៊ុនបានដាក់ទៅឲ្យគណៈកម្មការមូលបត្រកម្ពុជាដែលទាក់ទងនឹងសំណើសុំការអនុញ្ញាតដើម្បីធ្វើការបោះផ្សាយលក់មូលបត្រជាសាធារណៈ។ នេះបើយោងតាមសេចក្តីជូនដំណឹងរបស់ក្រុមហ៊ុន Pestech International ដែលផ្សាយនៅផ្សារភាគហ៊ុនម៉ាឡេស៊ី។
លោក ល្មុន សូឡី នាយកផ្នែកប្រតិបត្តិការទីផ្សារនៅផ្សារមូលបត្រកម្ពុជា (CSX) បានប្រាប់ភ្នំពេញប៉ុស្តិ៍កាលពីម្សិលមិញថា មន្ត្រី CSX នឹងត្រួតពិនិត្យឯកសារដែលបានភ្ជាប់មកទាក់ទងនឹងសំណើសុំត្រួតពិនិត្យលទ្ធភាពបោះផ្សាយលក់ភាគហ៊ុន (LER) នេះ ដែលលោកបញ្ជាក់ថា CSX នឹងធ្វើការឆ្លើយតបក្នុងរយៈពេលមិនលើសពីមួយខែនោះទេ គិតចាប់ពីពេលដែលបានទទួលឯកសារគ្រប់គ្រាន់ និងសំណើពេញលេញ។
យោងតាមលោក សូឡី ក្រុមហ៊ុនមេរបស់ក្រុមហ៊ុន Pestech Cambodia ដែលមានមូលដ្ឋាននៅម៉ាឡេស៊ីគឺជាក្រុមហ៊ុនដែលមានកេរ្តិ៍ឈ្មោះ និងគោរពតាមច្បាប់ត្រឹមត្រូវព្រមទាំងបានបោះផ្សាយលក់មូលបត្ររួចហើយនៅផ្សារភាគហ៊ុនម៉ាឡេស៊ី។
លោកបញ្ជាក់ថាកត្តានេះគឺជាជំនួយដល់ក្រុមហ៊ុនអាចបោះផ្សាយលក់ភាគហ៊ុនបានដូចដែលបានគ្រោងទុកគឺនៅក្នុងអំឡុងឆមាសទី ២ ឆ្នាំ ២០១៨។
លោកថ្លែងថា៖ «វាជាសញ្ញាល្អ ដែលបង្ហាញថាក្រុមហ៊ុនធំមានទំនុកចិត្តមកលើផ្សារយើង»។
លោកបន្តថា៖«នៅពេលដែលមានក្រុមហ៊ុនកាន់តែច្រើនបោះផ្សាយលក់ភាគហ៊ុន វាបានបង្កើតផលិតផលច្រើនជាងមុនដល់វិនិយោគិនក្នុងការជួញដូរ ដែលយើងរំពឹងថា នឹងជួយឲ្យទីផ្សារកាន់តែមានសកម្មភាពខ្លាំងក្លាឡើង»។
លោក សូឡី មានសុទិដ្ឋិនិយមថា សកម្មភាពជួញដូរនៅ CSX នឹងមានសកម្មភាពច្រើនជាងឆ្នាំមុន ទោះបីជានឹងមានការបោះឆ្នោតជាតិនៅឆ្នាំក្រោយក៏ដោយ ក៏លោកពន្យល់ថា Pestech នឹងចុះបញ្ជីនៅទីផ្សារគោលត្រឹមត្រីមាសទី ២ ឆ្នាំ ២០១៨។
លោកបន្តថា SME មួយចំនួននឹងចុះបញ្ជីនៅទីផ្សារកំណើន ហើយក្រុមហ៊ុនមួយចំនួននឹងចេញលក់មូលបត្របំណុលក្រុមហ៊ុន។
ក្រុមហ៊ុន Pestech Cambodia បានបញ្ចប់គម្រោងខ្សែបញ្ជូនថាមពលអគ្គិសនីលើកដំបូងរបស់ខ្លួន កាលពីខែមិថុនា ឆ្នាំ ២០១៣។
បច្ចុប្បន្នក្រុមហ៊ុននេះកំពុងបន្តការងារលើកិច្ចព្រមព្រៀងតម្លៃ ៩២ លានដុល្លារ ក្នុងការអភិវឌ្ឍខ្សែបញ្ជូនថាមពលអគ្គិសនី ២៣០ គីឡូវ៉ុលរវាងខេត្តក្រចេះនិងខេត្តកំពង់ចាម ព្រមទាំងកិច្ចព្រមព្រៀងតម្លៃ ១០០ លានដុល្លារក្នុងការសាងសង់ខ្សែបញ្ជូនថាមពល ២៣០ គីឡូវ៉ុលដែលតភ្ជាប់ទំនប់វារីអគ្គិសនីស្ទឹងតាតៃ របស់ខេត្ត កោះកុង មកទីក្រុងភ្នំពេញផងដែរ។
កាលពីសប្ដាហ៍មុន ក្រុមហ៊ុននេះបានប្រកាសនៅក្នុងឯកសារផ្សារហ៊ុនម៉ាឡេស៊ីថា ខ្លួនបានទទួលគម្រោងតម្លៃ ២៦ លានដុល្លារ លើគម្រោងអគ្គិសនីថ្មីចំនួន ៣ នៅកម្ពុជា រួមមានស្ថានីយចែកចាយបន្តថ្មីមួយនៅទីក្រុងភ្នំពេញ ព្រមទាំងស្ថានីយចែកចាយបន្តថ្មីពីរទៀត និងខ្សែបញ្ជូនអគ្គិសនី ១១៥ គីឡូវ៉ុលពីសៀមរាបទៅ ខេត្តឧត្តរមានជ័យផងដែរ។
តំណាងក្រុមហ៊ុន Pestech Cambodia បានស្នើសុំមិនផ្ដល់ការអត្ថាធិប្បាយលម្អិតណាមួយស្ដីពីផែនការនេះទេ កាលពីថ្ងៃម្សិលមិញ។ ប៉ុន្តែ យោងតាមឯកសាដែលបានដាក់ទៅផ្សារហ៊ុនម៉ាឡេស៊ី ការបោះផ្សាយមូលបត្រសាធារណៈលើកដំបូង (IPO) របស់ Pestech នៅផ្សារមូលបត្រកម្ពុជានឹងមានរហូតដល់ ៣៩ លានភាគហ៊ុន។
ផ្អែកលើតម្លៃ IPO ដែលបានបង្ហាញ ០,៧០ ដុល្លារក្នុងមួយភាគហ៊ុន អាចឲ្យក្រុមហ៊ុន រកប្រាក់បាន ២០,៣ លានដុល្លារសម្រាប់គម្រោងអភិវឌ្ឍន៍នៅ កម្ពុជា៕
