យោងតាមទិន្នន័យរបស់ក្រុមហ៊ុនផ្សារមូលបត្រកម្ពុជា (ផ.ម.ក.) សន្ទស្សន៍ថ្លៃរបស់ ផ.ម.ក. បានកើនឡើងដល់ ៤១៦,៣០ពិន្ទុ នៅពេលបិទការជួញដូរក្នុងថ្ងៃនេះ ដោយមានការកើនឡើង ២២,៣៦% បើប្រៀបធៀបនឹងកាលពីដើមឆ្នាំ២០១៨នេះ។
នៅក្នុងកំឡុងពេល ៨ខែដំបូង តួលេខដែលបង្ហាញពីបម្រែបម្រួលថ្លៃភាគហ៊ុនទាំងអស់ដែលចុះបញ្ជីនៅ ផ.ម.ក. ឬហៅថាសន្ទស្សន៍ ផ.ម.ក. ប្រែប្រួលតែនៅក្រោមកម្រិត ៣៥០ពិន្ទុប៉ុណ្ណោះ ដោយគិតជាមធ្យមគឺប្រមាណ ៣៣៤ ពិន្ទុ។ បើមើលតាមក្រាបខាងក្រោម សន្ទស្សន៍ ផ.ម.ក. ចាប់ផ្តើមមានទំនោរកើនឡើងនៅចុងត្រីមាសទី៣ ហើយបន្តកើនឡើងរហូតដល់ថ្ងៃនេះ ដែលជាថ្លៃខ្ពស់ជាងគេសម្រាប់ឆ្នាំ២០១៨។ ចំនុចដែលគួរឲ្យកត់សម្គាល់នៅថ្ងៃនេះផងដែរ គឺសន្ទស្សន៍ថ្លៃបានហក់ឡើងខ្ពស់បំផុតដល់ ៤២១,៤២ ពិន្ទុ មុននឹងធ្លាក់ចុះមក៤១៦,៣០ពិន្ទុ នៅពេលបិទផ្សារ។
ទំនោរកើនឡើងខ្លាំងនៃសន្ទស្សន៍ដែលចាប់ផ្តើមពីចុងត្រីមាសទី៣នេះ អាចបណ្តាលមកពីមូលហេតុចម្បងបីដូចខាងក្រោម៖
១. ការកើនឡើងនៃចំនួនគណនីជួញដូរ៖ ចំនួនគណនីជួញដូរសរុបបានកើនឡើងទ្វេដង ពីប្រមាណ ៩.៨៩១ នាក់ទៅជាង ២០.០០០ នាក់ កំឡុងពេលពីខែកក្កដាដល់ខែវិច្ឆិកា។ វត្តមានវិនិយោគិនថ្មីប្រាកដណាស់បង្កើតឲ្យមានតម្រូវការទិញភាគហ៊ុន ជាពិសេសភាគហ៊ុនដែលមានទិន្នផលខ្ពស់ និងប្រាក់ចំណេញច្រើនគួរឲ្យទាក់ទាញ ក៏ព្រោះតែវិនិយោគិនថ្មីត្រូវការទិញចូលភាគហ៊ុនបន្ទាប់ពីបើកគណនីជួញដូរ។
២. លទ្ធផលល្អនៃអាជីវកម្មរបស់ក្រុមហ៊ុនចុះបញ្ជី៖ ក្រុមហ៊ុនចុះបញ្ជីភាគច្រើនបានបង្ហាញលទ្ធផលប្រាក់ចំណេញ និងទិន្នផលភាគលាភខ្ពស់គួរឲ្យទាក់ទាញ ជាពិសេសភាគហ៊ុនរបស់កំពង់ផែទាំងពីរ គឺកំពង់ផែស្វ័យតក្រុងព្រះស៊ីហនុ (PAS) និងកំពង់ផែស្វយ័តភ្នំពេញ (PPAP) ដែលរួមចំណែកចម្បងក្នុងការធ្វើឲ្យសន្ទស្សន៍កើនឡើងខ្លាំងក្នុងកំឡុងពេលចុងក្រោយនេះ។ ជាក់ស្តែង នៅខែកក្កដាកន្លងទៅនេះ ភាគហ៊ុន PAS បានប្រកាសផ្តល់ភាគលាភសម្រាប់ឆ្នាំ២០១៧ រហូតដល់ ៧,៩០% ដែលជាអត្រាមួយខ្ពស់ បើធៀបនឹងទិន្នផលភាគលាភជាមធ្យមរបស់ផ្សារទាំងមូលដែលស្ថិតនៅចន្លោះពី ៤% - ៥%។ ជាមួយគ្នានេះផងដែរ ភាគហ៊ុន PPAP ក៏បានបង្ហាញពីការកើនឡើងនៃប្រាក់ចំណេញនៅត្រីមាសទី៣ឆ្នាំ២០១៨ រហូតដល់ ៥៩,៩៨% បើធៀបនឹងរយៈពេលដូចគ្នានៃឆ្នាំមុន។ ការប្រកាសពីលទ្ធផលល្អនៃអាជីវកម្មទាំងនេះ អាចជាហេតុផលទាក់ទាញវិនិយោគិនឲ្យទិញភាគហ៊ុនរបស់ពួកគេចូល និងធ្វើឲ្យថ្លៃកើនឡើង។
៣. ការធ្វើទំនាក់ទំនង និងផ្តល់ព័ត៌មានដល់វិនិយោគិន៖ ផ.ម.ក សហការជាមួយនឹងស្ថាប័នពាក់ព័ន្ធបាននិងកំពុងខិតខំប្រឹងប្រែងក្នុងការទាក់ទាញទាំងវិនិយោគិនក្នុងស្រុក និងក្រៅស្រុកតាមរយៈការធ្វើសិក្ខាសាលានិងជួបជជែកពិភាក្សាផ្ទាល់ជាមួយវិនិយោគិនទាំងក្នុង និងក្រៅប្រទេស ដើម្បីផ្លាស់ប្តូរយោបល់និងផ្តល់ព៍ត៌មានពីសក្តានុពលនៃទីផ្សារដែលកំពុងរីកចម្រើនមួយនេះ។
ជារួម សញ្ញាណដ៏ល្អទាំងអស់នេះអាចជាចំនុចចាប់ផ្តើមនៃសករាជថ្មីមួយនៃទីផ្សារ ដែលនឹងអាចបន្តទាក់ទាញការចាប់អារម្មណ៍កាន់តែច្រើនថែមទៀតពីសំណាក់សាធារណជនក្នុងការចូលមកវិនិយោគលើភាគហ៊ុនដែលចុះបញ្ជីនៅផ.ម.ក.។
