ទីផ្សារមូលបត្រនៅប្រទេសកម្ពុជាកំពុងមានការអភិវឌ្ឍន៍យ៉ាងគួរឱ្យកត់សំគាល់នៅមួយរយៈចុងក្រោយនេះ។ វិនិយោគិនបានវិនិយោគលើទីផ្សារមូលបត្រតាមរយៈការទិញ ឬការលក់មូលបត្រកម្មសិទ្ធិ ដោយរពឹងថានឹងទទួលបានប្រាក់ចំណេញនាពេលអនាគត។ មុននឹងវិនិយោគ វិនិយោគិនគួរតែធ្វើការស្រាវជ្រាវពីក្រុមហ៊ុន និងទីផ្សារឲ្យបានល្អិតល្អន់ជាមុន ដើម្បីកាត់បន្ថយហានិភ័យ និងបង្កើនលទ្ធភាពចំណេញ ដោយសិក្សាទៅលើ៖
១.ការសិក្សាស្វែងយល់ពីអាជីវកម្មក្រុមហ៊ុន៖
- ផលិតផល និងសេវាកម្មរបស់ក្រុមហ៊ុន
- ប្រវត្តិនៃការវិវត្តរបស់ក្រុមហ៊ុន
- ចក្ខុវិស័យ និងបេសកម្មរបស់ក្រុមហ៊ុន
- ផែនការ និងយុទ្ធសាស្ត្រអាជីវកម្មរបស់ក្រុមហ៊ុន
- សមត្ថភាពរបស់ស្ថាបនិក និងថ្នាក់ដឹកនាំសំខាន់ៗរបស់ក្រុមហ៊ុន
- គោលនយោបាយបែងចែកភាគលាភដល់ភាគហ៊ុននិក ។ល។
២.ការវិភាគលើស្ថានភាពហិរញ្ញវត្ថុរបស់ក្រុមហ៊ុន
ក្នុងចំនុចនេះ វិនិយោគិនត្រូវធ្វើការវិភាគ និងវាយតម្លៃលើរបាយការណ៍ហិរញ្ញវត្ថុដែលបានធ្វើសវនកម្មយ៉ាងត្រឹមត្រូវ។ វិនិយោគិនគប្បីប្រើប្រាស់ អនុបាតហិរញ្ញវត្ថុសំខាន់ៗសំរាប់គណនា និងវាយតម្លៃ សុខភាពហិរញ្ញវត្ថុ និងប្រសិទ្ធិភាពនៃការគ្រប់គ្រងធនធានរបស់ក្រុមហ៊ុន ដែលក្នុងនោះ មានដូចជា៖
- ការគណនាពីភាពចំណេញរបស់ក្រុមហ៊ុន (Profitability)
- Price-to-Earnings Ratio
- Price-to-Book Ratio
- Debt to Equity Ratio
- Return on Equity
- Return on Asset
៣.ការព្យាករណ៏ពីហានិភ័យនៃផ្សារហ៊ុនដែលអាចជួបប្រទះនាពេលអនាគត។ ហានិភ័យទាំងនោះមានដូចជា៖
- ហានិភ័យទីផ្សារ (Market Risk) គឺជាហានិភ័យដែលវិនិយោគិនជួបប្រទះនូវការខាតបង់ដោយសារកត្តាប៉ះពាល់ផ្សេងៗដូចជា៖ វិបត្តិសេដ្ឋកិច្ច កត្តានយោបាយ គោលយោបាយរបស់រដ្ឋាភិបាល បម្រែបម្រួលអត្រាការប្រាក់ តម្រូវការទីផ្សារ ការធ្លាក់ចុះប្រាក់ចំណូលជាដើម។
- ហានិភ័យសន្ទនីយភាព (Liquidity Risk) ជាភាពងាយស្រួលក្នុងការទិញ លក់ ក្នុងតម្លៃទីផ្សារជាក់ស្តែង។ ភាគហ៊ុន ដែលមិនមានការទិញលក់ច្រើន អាចនឹងធ្វើឱ្យយើងខាតបង់ ពេលមានតម្រូវការសាច់ប្រាក់ជាប្រញ៉ាប់។
៤.ការស្វែងយល់ពីការបង់ពន្ធនានាលើការវិនិយោគមូលបត្រ
៥.ការជ្រើសរើសរើសក្រុមហ៊ុនមូលបត្រឱ្យបានត្រឹមត្រូវ
វិនិយោគិនគប្បីប្រើប្រាស់សេវាកម្មរបស់ក្រុមហ៊ុនមូលបត្រ (Broker) ណាមួយដែលមានវិជ្ជាជីវៈខ្ពស់ ដើម្បីជាអ្នកប្រឹក្សាយោបល់ និងផ្តល់សេវាកម្មផ្សេងៗ។ កម្រៃជើងសារក៏ជាលក្ខខណ្ឌក្នុងការសម្រេចចិត្តជ្រើសរើស Broker ផងដែរ។
លោកអ្នកអាចស្វែងរកបញ្ជីឈ្មោះ Broker នៅ https://phsarhun.com/brokers# ។
៦.ការជ្រើសរើសរើសប្រភពព័ត៌មានដែលប្រកបដោយតម្លាភាព និងភាពត្រឹមត្រូវ
វិនិយោគិនអាចប្រមូលព័ត៌មានបានតាមរយៈ៖
- គេហទំព័ររបស់ក្រុមហ៊ុនផ្សារមូលបត្រកម្ពុជា http://www.csx.com.kh/។ វិនិយោគិននឹងទទួលបានព័ត៌មានស្តីពីក្រុមហ៊ុនចុះបញ្ជី ទិន្នន័យជួញដូរ និងព័ត៌មានផ្សេងៗទៀត។ វិនិយោគិនក៏អាចចូលមើលគេហទំព័ររបស់គណៈកម្មការមូលបត្រកម្ពុជា គេហទំព័ររបស់ក្រុមហ៊ុនមូលបត្រ ឬតាមរយៈគេហទំព័ររបស់ក្រុមហ៊ុនចុះបញ្ជីដោយផ្ទាល់។
- កាសែត ទូរទស្សន៍ វិទ្យុ និងគេហទំព័រដទៃទៀត ដែលមានប្រភពច្បាស់លាស់៕
