ភាគលាភ គឺជាការបែងចែកចំណែកនៃប្រាក់ចំណូលរបស់ក្រុមហ៊ុន ដែលបានកំណត់ និងសម្រេចតាមការប្រជុំមហាសន្និបាតភាគហ៊ុនិក ឬក្រុមប្រឹក្សាភិបាលរបស់ក្រុមហ៊ុន។ ក្រុមហ៊ុនអាចបែងចែកភាគលាភជាពីរប្រភេទគឺ៖ ភាគលាភជាសាច់ប្រាក់ និងភាគលាភជាភាគហ៊ុន។ ដើម្បីទទួលបានភាគលាភ វិនិយោគិនត្រូវមានឈ្មោះនៅក្នុងបញ្ជីឈ្មោះភាគហ៊ុនិកនៅថ្ងៃប្រកាសបញ្ជីឈ្មោះភាគហ៊ុនិកដែលត្រូវទទួលភាគលាភ (Record Date)។ ប៉ុន្តែការទិញភាគហ៊ុនមិនអាចធ្វើឱ្យវិនិយោគិនក្លាយជាភាគហ៊ុនិករបស់ក្រុមហ៊ុននោះភ្លាមៗបានទេ ព្រោះទីផ្សាររបស់យើងត្រូវការរយៈពេលពីរថ្ងៃ ដើម្បីធ្វើការទូទាត់។ ដូចនេះ ដើម្បីមានឈ្មោះនៅក្នុងបញ្ជីឈ្មោះភាគហ៊ុនិកនៅថ្ងៃ Record Date យើងត្រូវទិញភាគហ៊ុនឱ្យបានមុនយ៉ាងតិចពីរថ្ងៃជួញដូរ។
ឧទាហរណ៍៖ Record Date សម្រាប់ការបែងចែងភាគលាភរបស់ PAS គឺថ្ងៃទី ១០ ខែមិថុនា ឆ្នាំ ២០២០។ ដូចនេះប្រសិនបើវិនិយោគិនចង់ទទួលបានភាគលាភ វិនិយោគិនត្រូវទិញភាគហ៊ុនឱ្យបានយ៉ាងយូរត្រឹមថ្ងៃទី ០៨ ខែមិថុនា ឆ្នាំ ២០២០។ ដូចគ្នាដែរ អ្នកដែលលក់ហ៊ុនក្នុងថ្ងៃនេះ នឹងមិនទទួលបានភាគលាភទេ។ យ៉ាងណាមិញ ថ្លៃភាគហ៊ុននៅថ្ងៃទី ០៩ ខែមិថុនា ឆ្នាំ ២០២០ គួរតែធ្លាក់ថ្លៃបន្តិច ព្រោះអ្នកទិញភាគហ៊ុននឹងមិនទទួលបានភាគលាភទេ ចំណែកអ្នកលក់ភាគហ៊ុនវិញ នៅតែទទួលបានភាគលាភដដែល។
កាលកំណត់ការបែងចែកភាគលាភអាស្រ័យទៅនឹងសេចក្តីសំរេចរបស់អង្គប្រជុំ ដែលជាទូទៅនៅចន្លោះ ខែមេសា ដល់ខែកក្កដានៃឆ្នាំនីមួយៗ។ ជាទូទៅ ភាគលាភនៅផ្សារមូលបត្រកម្ពុជាយើង ត្រូវបានបែងបែងមួយឆ្នាំម្តង។
ភាគលាភ នឹងត្រូវដាក់បញ្ចូលទៅក្នុងគណនីជួញដូររបស់វិនិយោគិន យ៉ាងយូរមួយសប្តាហ៍ បន្ទាប់ពីកាលបរិច្ឆេទទូទាត់ភាគលាភ ដែលបានប្រកាស។ វិនិយោគិនអាចប្រើប្រាស់លុយនោះ ដើម្បីវិនិយោគបន្ត ឬស្នើរទៅ Broker របស់ខ្លួន ដើម្បីដកយកទៅប្រើប្រាស់បាន។
វិនិយោគិនអាចស្វែងរកព័ត៌មាននៃការបែងចែកភាគលាភដោយការចូលទៅកាន់គេហទំព័ររបស់ទីផ្សារមូលបត្រកម្ពុជា csx.com.kh ដែលបង្ហាញ វិនិយោគិនពីសេចក្តីប្រកាសព័ត៌មាននានារបស់ក្រុមហ៊ុនចុះបញ្ជី របាយការណ៏ត្រីមាស ការសម្រេចបែងចែកភាគលាភ និងព័ត៌មានដ៏ទៃទៀតដែលពាក់ព័ន្ធនឹងក្រុមហ៊ុនចុះបញ្ជីមូលបត្រ ឬ ចូលទៅកាន់គេហទំព័ររបស់ក្រុមហ៊ុនចុះបញ្ជីបោះផ្សាយលក់មូលបត្រដោយផ្ទាល់។ វិនិយោគិន ឬសាធារណជនក៏អាច subscribe email ព័ត៌មានទាំងនេះពីគេហទំព័ររបស់ទីផ្សារមូលបត្រកម្ពុជាផងដែរ។
