បន្ទាប់ពីវិនិយោគិនបើកគណនីជួញដូរនៅក្រុមហ៊ុនមូលបត្ររួចរាល់ហើយ វិនិយោគិនអាចធ្វើការបញ្ជាទិញឬលក់ភាគហ៊ុននៅលើទីផ្សារមូលបត្រកម្ពុជា តាមរយៈប្រព័ន្ធជួញដូរចល័តបាន។ អាស្រ័យហេតុនេះ វិនិយោគិនគប្បីធ្វើការស្វែងយល់ពីប្រភេទនៃការបញ្ជាទិញឬលក់ដែលស័ក្តសមនឹងកំរិត ហានិភ័យទាប និងចំណេញពេលវេលា។
១. បញ្ជាដែនកំណត់ ជាការបញ្ជាទិញឬលក់ មូលបត្រនៅថ្លៃកំណត់ណាមួយដែល ថ្លៃបញ្ជាទិញ គឺជាថ្លៃដែលហ៊ានទិញខ្ពស់បំផុត និងថ្លៃបញ្ជាលក់ គឺជាថ្លៃដែលហ៊ានលក់ទាបបំផុត។ ប្រភេទបញ្ជាដែនកំណត់ត្រូវបានអនុញ្ញាតឱ្យនិវិយោគិនធ្វើការកែតម្រូវបញ្ជា និងការលុបបញ្ជានៃការទិញឬលក់មូលបត្របាន។ ប្រភេទបញ្ជាដែនកំណត់ក៏តម្រូវឱ្យវិនិយោគិនមានការបង្កកសាច់ប្រាក់ស្មើនឹងថ្លៃគុណនឹងបរិមាណបញ្ជា បូកបន្ថែមថ្លៃសេវាឈ្មួញជើងសារមូលបត្រ។ ប្រភេទបញ្ជានេះផ្តល់គុណប្រយោជន៍ដល់វិនិយោគិនក្នុងការគ្រប់គ្រងលើការជួញដូររបស់ភាគហ៊ុនណាដែលមានចំនួនជួញដូរតិចតួច និងមានកំលាតថ្លៃទិញ -ថ្លៃលក់ខ្ពស់ (bid-ask spread)។
ឧទាហរណ៏៖ បញ្ជាដែនកំណត់ទិញដែលមានថ្លៃ ៤.៥០០រៀល វិនិយោគិនអាចជួញដូរបាននៅថ្លៃ ៤.៥០០រៀល ឬទាបជាងនេះ ចំណែកបញ្ជាដែនកំណត់លក់ដែលមានថ្លៃ៤.៥០០រៀល អាចជួញដូរបាននៅថ្លៃ៤.៥០០រៀល ឬខ្ពស់ជាងនេះ។
២. បញ្ជាទីផ្សារ ជាការបញ្ជាទិញឬលក់ មូលបត្រកម្មសិទ្ធិភ្លាមៗនៅថ្លៃដែលល្អបំផុតដែលមានក្នុងទីផ្សារ។ បញ្ជាទីផ្សារត្រូវបានបន្ថែមនូវជម្រើសលក្ខខណ្ឌ ចំនួន២បន្ថែមទៀតសម្រាប់វិនិយោគិន បន្ថែមលើបញ្ជាធម្មតា (ផ្គូផ្គងសល់ ទុកលើទីផ្សារបន្ត FAS) គឺ៖
ឧទាហរណ៏៖ វិនិយោគិនធ្វើការបញ្ជាទិញភាគហ៊ុន ក នៃបញ្ជាទីផ្សារតាមលក្ខខណ្ឌជួញដូរទាំងស្រុង ឬលុបចោល (FOK) ដែលមានបរិមាណចំនួន៣០០ អាចផ្គូផ្គងបានលុះត្រាតែបរិមាណនៃបញ្ជាលក់ម្ខាងទៀតមានចំនួនច្រើនជាង ឬស្មើ៣០០។
ឧទាហរណ៏៖ វិនិយោគិនបញ្ជាទិញភាគហ៊ុន ខ នៃបញ្ជាទីផ្សារតាមលក្ខខណ្ឌជួញដូរ ហើយលុបចោល (FAK) ដែលមានបរិមាណចំនួន១៥០ ត្រូវបានផ្គូផ្គងជាមួយបញ្ជាលក់ដែលមានបរិមាណមូលបត្រចំនួន៥០ ដូចនេះ បរិមាណភាគហ៊ុនដែលនៅសល់បន្ទាប់ពីការផ្គូផ្គងចំនួន ១០០ នឹងត្រូវលុបចោលភ្លាមដោយស្វ័យប្រវត្តិ។
លក្ខខណ្ឌខាងលើត្រូវបានអនុវត្តតាមវិធីសាស្ត្រដេញថ្លៃដោយយកថ្លៃច្រើន និងនៅពេលដែលមានបញ្ជាផ្ទុយគ្នានៅម្ខាងទៀត។ សម្រាប់ប្រភេទបញ្ជាទីផ្សារ មិនត្រូវបានអនុញ្ញាតឱ្យវិនិយោគិនធ្វើការកែប្រែបញ្ជានោះទេ ប៉ុន្តែវិនិយោគិនត្រូវបានអនុញ្ញាតឱ្យធ្វើការលុបបញ្ជានៃការទិញឬលក់។ វិនិយោគិនតម្រូវឱ្យធ្វើការបង្កកសាច់ប្រាក់ស្មើនឹងថ្លៃដែនកំណត់គុណនឹងបរិមាណបញ្ជា បូកបន្ថែមថ្លៃសេវាឈ្មួញជើងសារមូលបត្រសម្រាប់ធ្វើការបញ្ជាទីផ្សារ។ វិនិយោគិនប្រើប្រាស់ប្រភេទបញ្ជាទីផ្សារនេះ ព្រោះពួកគេអាចទិញឬលក់ភាគហ៊ុនភ្លាមៗ ដោយមិនចាំបាច់ពន្យារពេល។
