ចំណេះដឹងផ្នែកហិរញ្ញវត្ថុមានអត្ថប្រយោជន៍យ៉ាងខ្លាំងចំពោះសេចក្តីសុខក្នុងជីវិត ក៏ដូចជាសេរីភាព ឬសុវត្ថិភាពផ្នែកហិរញ្ញវត្ថុ។ ការស្វែងយល់ពីវិធីសាស្ត្រត្រឹមត្រូវក្នុងការបង្កើនចំណូលមានសារៈសំខាន់ជាងការខិតខំធ្វើការ ដោយមិនមានទិសដៅច្បាស់លាស់។ ប្រសិនបើលោកអ្នកចង់ទទួលបាននូវជីវិតមួយ ដែលមានសេរីភាពផ្នែកហិរញ្ញវត្ថុ លោកអ្នកគប្បីសិក្សា និងស្វែងយល់ពីការទទួលបាននូវចំណូលពីមនុស្ស៤ក្រុមខាងក្រោម៖
១. និយោជិក (E)៖ ប្រសិនបើអ្នកជាអ្នកធ្វើការនៅ Office, អ្នកនឹងកំពុងតែមានអារម្មណ៍មួយថា ធ្វើការយូរហើយ ដូចជាមិនមាននៅសល់អ្វីសោះ។ មូលហេតុ គឺដោយសារតែប្រាក់ខែរបស់យើងឡើងមិនទាន់តម្លៃទំនិញ។ ការងារអាចផ្តល់ប្រាក់ខែច្រើន ប្រសិនបើយើងធ្វើការច្រើនម៉ោងក្នុងមួយថ្ងៃៗ ដែលធ្វើឱ្យយើងគ្មានពេលសម្រាកគ្រប់គ្រាន់ ឬធ្វើឱ្យប៉ះពាល់ដល់សុខភាព។ នៅពេលដែលលោកអ្នកមានជំងឺឈឺថ្កាត់ ឬមានបញ្ហាណាមួយ ដែលមិនអាចធ្វើការបាន នោះចំណូលរបស់លោកអ្នកនឹងត្រូវថយទៅតាមនោះផងដែរ
២. អ្នកធ្វើការឱ្យខ្លួនឯង ឬអ្នកជំនាញ (S)៖ ប្រសិនបើការងាររបស់លោកអ្នកស្ថិតនៅក្នុងប្រភេទបែបនេះ នោះលោកអ្នកអាចស្វែងរកចំណូលបានច្រើនបង្គួរ ទៅតាមការខិតខំប្រឹងប្រែងរបស់អ្នក។ ការប្រកបមុខរបរផ្ទាល់ខ្លួន ដូចជាការលក់ដូរតិចតួចនៅផ្ទះ ឬនៅតាមទីផ្សារ ឬនៅតាមអនឡាញជាដើម គឺតម្រូវឱ្យលោកអ្នកចំណាយពេលវេលាច្រើន សម្រាប់គ្រប់គ្រងការងារនេះដោយខ្លួនឯង ដែលអាចនាំឱ្យលោកអ្នកមិនមានពេលវេលាគ្រប់គ្រាន់ក្នុងការសម្រាកលំហែកម្សាន្ត។
៣. ម្ចាស់អាជីវកម្ម (B)៖ ប្រសិនបើលោកអ្នកជាម្ចាស់អាជីវកម្ម នោះបានន័យថាក្រុមហ៊ុនរបស់លោកអ្នកបានដំណើរការជាប្រព័ន្ធ ដែលក្រុមហ៊ុនអាចដំណើរការបានដោយពុំចាំបាច់មានការត្រួតពិនិត្យគ្រប់ពេលដោយលោកអ្នក។ បុគ្គលិកនឹងធ្វើការតាមការរៀបចំរបស់លោកអ្នក ហើយលោកអ្នកនឹងទទួលបាននូវផលចំណេញដែលពួកគេបង្កើត ដែលច្រើនជាងប្រាក់ខែដែលអ្នកផ្តល់ឱ្យពួកគេ។
៤. វិនិយោគិន (I)៖ វិនិយោគិនមានលក្ខណៈពិសេសជាងប្រភេទការងារទាំងបីខាងលើ នៅត្រង់ចំណូលដែលគេទទួលបានមានលក្ខណៈជាស្វ័យគុណ ដែលមិនមែនជាផលគុណដូចម្ចាស់អាជីវកម្ម(B)ឡើយ។ លោកអ្នកត្រូវការចំណេះដឹងមួយចំនួនក្នុងការសម្រេចចិត្តវិនិយោគទៅលើអ្វីមួយ ដូចជាអចលនទ្រព្យ ឬ ភាគហ៊ុនជាដើម ដែលអាចកើនឡើងនូវតម្លៃ។ លោកអ្នកអាចមានពេលសម្រាកគ្រប់គ្រាន់ដោយមិនត្រូវការគ្រប់គ្រងទៅលើការវិនិយោគជារៀងរាល់ថ្ងៃនោះទេ ដែលក្នុងន័យនេះ លុយអាចធ្វើការជូនលោកអ្នកបាន។
ប្រភេទការងារជានិយោជិក(E) និងអ្នកធ្វើការឱ្យខ្លួនឯង ឬអ្នកជំនាញ(S) ទទួលបានចំណូលជាលក្ខណៈសកម្ម (Active Income) ដែលតម្រូវឱ្យលោកអ្នកត្រូវចំណាយពេលធ្វើការដោយខ្លួនឯង ដើម្បីទទួលបានចំណូល។ ចំណែកឯប្រភេទការងារជាម្ចាស់អាជីវកម្ម(B) និងវិនិយោគិន(I)វិញ ទទួលបានចំណូលជាលក្ខណៈអកម្ម (Passive Income) ដែលមិនតម្រូវឱ្យលោកអ្នកត្រូវចំណាយពេលធ្វើការដោយខ្លួនឯងនោះឡើយ ក្នុងការទទួលបានចំណូល។
ដូចនេះ ដើម្បីទទួលបានសេរីភាពហិរញ្ញវត្ថុ លោកអ្នកគួរគប្បីរៀនធ្វើការវិនិយោគចាប់ពីថ្ងៃនេះតទៅ។ យ៉ាងណាមិញ ខ្ញុំសូមលើកយកឧទាហរណ៍នៃការវិនិយោគមួយ ដែលមិនទាមទារឱ្យមានចំណេះដឹង និងដើមទុនច្រើននោះ គឺការវិនិយោគលើភាគហ៊ុន។ វិនិយោគលើភាគហ៊ុន បានន័យថាលោកអ្នកបានក្លាយជាម្ចាស់កម្មសិទ្ធិម្នាក់ របស់ក្រុមហ៊ុននោះ ហើយបុគ្គលិកយ៉ាងច្រើនបានកំពុងតែធ្វើការជូនលោកអ្នក។ លោកអ្នកអាចទទួលបានចំណូលជាភាគលាភជាទូទៅមួយឆ្នាំម្តង និងអាចចំណេញពីការលក់ភាគហ៊ុន នៅពេលដែលថ្លៃភាគហ៊ុនកើនឡើង។ លោកអ្នកអាចចាប់ផ្តើមវិនិយោគត្រឹមតែមួយហ៊ុនឡើងទៅ ឬទឹកប្រាក់ប្រហែលបួនពាន់រៀល។
