គ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត (ហត្ថាកសិករ) ដែលជាគ្រឹះស្ថានមីក្រូហិរញ្ញវត្ថុឈានមុខគេ និងផ្តល់សេវាកម្មដល់អតិថិជននៅ ២៥ ខេត្តរាជធានី ក្នុងព្រះរាជាណាចក្រកម្ពុជា បានចាប់ផ្តើមការជួញដូរសញ្ញាបណ្ណសាជីវកម្មរបស់ខ្លួន ដែលមានឈ្មោះថា “សញ្ញាបណ្ណសាជីវកម្មដំបូងបំផុតនៅកម្ពុជា លេខ ១” នៅផ្សារមូលបត្រកម្ពុជា។ សញ្ញាបណ្ណនេះ នឹងត្រូវបានជួញដូរក្រោមនិមិត្តសញ្ញាផ្សារមូលបត្រកម្ពុជា “HKL21A” ។
បន្ទាប់ពីការចុះបញ្ជីលក់ជាផ្លូវការនៅថ្ងៃទី ០៥ ខែ ធ្នូ ឆ្នាំ ២០១៨ វិនិយោគិនរូបវន្តបុគ្គល អាចដាក់សំណើទិញ ឬលក់ សញ្ញាបណ្ណនេះតាមរយៈឈ្មួញជើងសាមូលបត្ររបស់ខ្លួន ដែលដំណើរការនៃការជួញដូរនេះប្រហាក់ប្រហែលនឹងដំណើរការនៃការជួញដូរមូលបត្រកម្មសិទ្ធិ ។ តម្លៃចារឹកក្នុងមួយសញ្ញាបណ្ណ គឺ ១០០.០០០ រៀល ជាមួយនឹងអត្រា គូប៉ុង (អត្រាការប្រាក់) ៨,៥០% ក្នុងមួយឆ្នាំ ។ តម្លៃនៃសញ្ញាបណ្ណ អាចនឹងប្រែប្រួលផ្អែកលើតម្រូវការទីផ្សារ (ទិញ និងលក់) និងអត្រាការប្រាក់នៃផលិតផលដូចជាប្រាក់បញ្ញើមានកាលកំណត់ និងគណនីសន្សំ ។ ការវិនិយោគលើសញ្ញាបណ្ណ អាចទទួលបានប្រាក់ចំនេញ ឬខាតមូលធន ដោយផ្អែកលើតម្លៃសញ្ញាបណ្ណ បន្ថែមលើការទទួលបានអត្រាគូប៉ុង ៨,៥០% ក្នុងមួយឆ្នាំ (ទូទាត់រៀងរាល់ឆមាស) រហូតដល់ឥណប្រតិទាននៅឆ្នាំ ២០២១ (សញ្ញាបណ្ណនេះមានរយៈពេល ៣ ឆ្នាំ គិតចាប់ពី ថ្ងៃទី ១៤ ខែ វិច្ឆិកា ឆ្នាំ ២០១៨ រហូតដល់ថ្ងៃទី ១៤ ខែ វិច្ឆិកា ឆ្នាំ ២០២១)។
ហត្ថាកសិករ បានបង្កើតនូវប្រវត្តិសាស្រ្ត ដោយបោះផ្សាយសញ្ញាបណ្ណសាជីវកម្មដំបូងបំផុតនៅកម្ពុជា នៅថ្ងៃទី ១៤ ខែ វិច្ឆិកា ឆ្នាំ ២០១៨។ ទំហំសរុបនៃការបោះផ្សាយគឺ ១២០ ពាន់លានរៀល (ប្រហែល ៣០ លានដុល្លារអាមេរិក) ដោយមានការចូលរួមធ្វើបរិវិសកម្មពីសំណាក់វិនិយោគិនស្ថាប័នក្នុងស្រុក និងក្រៅស្រុក។ ការដាក់ឲ្យដំណើរការផ្សារមូលបត្របំណុលនេះ នឹងផ្តល់នូវប្រភពមូលនិធិថ្មីមួយទៀតសម្រាប់ក្រុមហ៊ុនក្នុងស្រុក និងជាជម្រើសវិនិយោគថ្មីមួយទៀតសម្រាប់វិនិយោគិន។
ហត្ថាកសិករ រំពឹងថាសាច់ប្រាក់ដែលទទួលបានពីការបោះផ្សាយសញ្ញាបណ្ណ នឹងត្រូវប្រើប្រាស់ក្នុងការធ្វើហិរញ្ញប្បទានកំណើននៃអាជីវកម្មឥណទាន រួមទាំងជាទុនបង្វិល និងសម្រាប់ចំណាយមូលធនរបស់ក្រុមហ៊ុន។ សាច់ប្រាក់ដែលទទួលបានពីការបោះផ្សាយសញ្ញាបណ្ណនេះ នឹងជួយគាំទ្រសហគ្រាសខ្នាតមីក្រូ តូច និងមធ្យមនៅតាមជនបទ ដែលរួមមានសហគ្រិនជាស្រ្តីនៅក្នុងព្រះរាជាណាចក្រកម្ពុជា។
ហត្ថាកសិករ គឺជាគ្រឹះស្ថានមីក្រូហិរញ្ញវត្ថុទទួលបានអាជ្ញាបណ្ណប្រកបអាជីវកម្មទទួលប្រាក់បញ្ញើសន្សំពីសាធារណៈជន ដែលស្ថិតក្រោមច្បាប់ និងបទបញ្ញត្តិគ្រឹះស្ថានធនាគារ និងហិរញ្ញវត្ថុនៃព្រះរាជាណាចក្រកម្ពុជា។ គិតត្រឹមឆ្នាំ ២០១៧ ប្រាក់ចំណេញសុទ្ធរបស់ហត្ថាកសិករ មានចំនួន ១៥,៣៦ លានដុល្លារអាមេរិក និងទ្រព្យសកម្មសរុបចំនួន៦៩១,០១ លានដុល្លារអាមេរិក។
