នាថ្ងៃទី២៤ ខែធ្នូ ឆ្នាំ២០១៨ ផ្សារមូលបត្រកម្ពុជាមានការជួញដូរភាគហ៊ុនសរុបចំនួន ២.១៥០.៥៣៥ ភាគហ៊ុន ដែលជាតួលេខខ្ពស់បំផុតគិតចាប់ពីពេលដាក់ឲ្យដំណើរការទីផ្សារកាលពីឆ្នាំ២០១២។ កំណត់ត្រាជួញដូរច្រើនបំផុតកន្លងមកគឺមានចំនួន ៩៣៩.៤៩៨ ភាគហ៊ុន កាលពីថ្ងៃទី០៥ ខែកក្កដា ឆ្នាំ២០១៧។
កាលពីព្រឹកថ្ងៃដដែលនេះផងដែរ ភាគហ៊ុនទាំងប្រាំសុទ្ធតែមានការជូញដូរ ប៉ុន្តែ៩៩%នៃទំហំ ជួញដូរសរុប គឺជារបស់កំពង់ផែស្វយ័តក្រុងព្រះសីហនុ (PAS)។ អ្វីដែលគួរអោយកត់សំគាល់នោះគឺ ការជួញដូរនូវបរិមាណដ៏ច្រើននេះ ស្ទើរតែទាំងអស់ គឺជាការជួញដូរតាមការចរចា លើភាគហ៊ុន PAS ដែលមានចំនួន ២.១៤៤.៣០០ ភាគហ៊ុន ដោយមានក្រុមហ៊ុនមូលបត្រ អេសប៊ីអាយ រ៉ូយ៉ាល់ ស៊ីឃ្យួរឹធី ជាឈ្ញួញជើងសារ ខណៈដែលបរិមាណដែលនៅសល់គឺជា ការជួញដូរតាមវិធីសាស្ត្រដេញថ្លៃ។ នេះគឺជាលើកទីពីរហើយដែលវិធីសាស្ត្រជួញដូរតាមការចរចាត្រូវបានប្រើប្រាស់ ចាប់តាំងពីពេលដាក់អោយដំណើរការជាផ្លូវការនាដើមឆ្នាំនេះ ដោយលើកទី១ត្រូវបានប្រើប្រាស់ក្នុងការជួញដូរលើភាគហ៊ុនកំពង់ផែស្វយ័តភ្នំពេញ (PPAP) ដែលមានបរិមាណសរុប ៧៣.០៩៨ ភាគហ៊ុន កាលពីខែមេសា ឆ្នាំ២០១៨ ។
សូមរំលឹកឡើងវិញផងដែរថា វិធីសាស្ត្រជួញដូរតាមការចរចា គឺជាវិធីសាស្ត្រថ្មីមួយដែលត្រូវបានដាក់ឲ្យដំណើរការនៅក្នុងផ្សារមូលបត្រកម្ពុជាកាលពីខែមករា ឆ្នាំ២០១៨ បន្ថែមទៅលើវិធីសាស្ត្រជួញដូរតាមការដេញថ្លៃដែលមានស្រាប់។ វិធីសាស្ត្រជួញដូរតាមការចរចា អនុញ្ញាតឲ្យវិនិយោគិនអាចទិញ ឬលក់ភាគហ៊ុន ឬសញ្ញាបណ្ណក្នុងទំហំធំជាមួយដៃគូរបស់ខ្លួននៅថ្លៃដែលបានចរចាគ្នារួចជាស្រេច ដោយគ្រាន់តែធ្វើការដាក់បញ្ជានិងផ្គូផ្គងជាមួយគ្នានៅក្នុងប្រព័ន្ធជួញដូររបស់ទីផ្សារ។ រីឯវិធីសាស្ត្រជួញដូរតាមការដេញថ្លៃ គឺជាវិធីសាស្ត្រជួញដូរដែលវិនិយោគិនត្រូវ ដាក់បញ្ជាទិញ និងលក់មូលបត្ររបស់ពួកគេទៅក្នុងប្រព័ន្ធជួញដូររបស់ ផ.ម.ក. ដើម្បីផ្គូផ្គងដោយផ្អែកតាមវិធានជួញដូររបស់ទីផ្សារនិងគោលការអាទិភាពនៃការដេញថ្លៃគឺថ្លៃនិងពេលវេលា។
